Auður Guðfinna Sigurðardóttir

4.4.2008 | 12:39

Hlutverkaleikir og klöppum fyrir því

Er mikið búin að vera að spá í þau mörgu hlutverk sem maður leikur á lífsleiðinni og þá kannski sérstaklega hlutverkin sem maður er í í dag. Móðurhlutverkið spilar eðlilega mjög stóran part í þessu núna sérstaklega þegar maður er einn með púkana og nóg að gera að halda öllu saman og sinna öllum hlutverkunum. Ég fór t.d í hlutverk pípara í gær....hef yfirleitt alltaf hræðst það hlutverk mikið, skil ekki upp né niður í pípum eða vatns- eða klósettlögnum. En það er svona þegar maður getur ekki alltaf hóað í einhverja hjálp þá verður maður víst að feisa hlutina sjálfur. Eftir að baðvaskurinn var svona búinn að vera að stíflast hægt og rólega var komið að því óumflýjanlega, ég vissi að það hafði eitthvað dottið ofan í hann (eða verið troðið) fyrir einhverju síðan og ályktaði ég að það væri orsökin að núna rann ekkert ofan í hann. Eftir að hafa skoðað vel og vandlega pípurnar, fundið út hvar ætti að skrúfa þær í sundur, tók ég skúringarfötuna og byrjaði að losa ....OG viti menn eftir að vatnið hafði frussast út um allt sem var í pípunum kom í ljós 3 lok af linsuboxum, steinar, sandur, gras og meira að segja smá blóm líka og fullt af hárum.... Ekkert skrýtið að vaskurinn hafði gefist upp. En ég lærði á þessu að maður á nú alltaf allavega að prufa .... hvað er það versta sem hefði getað gerst....og ég tek það fram að ég vil ekkert endilega fá svar við þessu Wink

Vaskurinn er eins og nýr og ég klappa mér á bakið fyrir hetjulegan framgang í mínu fyrsta píparaverkefni.

Sum hlutverkineru hins vegar ekki eins auðveld og þetta...það eru hlutverkin þar sem maður þarf að fara í læknasloppinn, setja upp sálfræðigleraugun, svara heimspekilegum spurningum, taka fram agaröddina, skemmtanastjórahattinn eða fara í leikhaminn. þá fyrst reynir á sálartetrið, kænskuna, hugmyndaflugið og þolið. Tala nú ekki um að sinna öllum þessum hlutverkum án þess að segja styggðarorð, skiptir engu máli í hvernig formi maður er sjálfur, viðurkenni það alveg að það tekst nú ekki alltaf eeen maður gerir sitt besta - ræstitæknirinn, píparinn, smiðurinn, saumakonan, vinnukonan og þrællinn eru mun auðveldari hlutverk . Þau eru hrein og bein og maður á ekki það á hættu að aðgerðir í þessu hluverkum geta haft áhrif á gólftuskuna eða pípulagnirnar fyrir lífstíð.

Hvaða hlutverk er okkur mikilvægast - það er spurningin annars?